Marlie is ’n getroude vrou, maar wanneer Liam haar ontmoet waar sy by haar neef (en sy drinkebroer) kuier, is sy al waaraan hy dag en nag kan dink. Dit help ook nie dat sy hom konstant tart en uitlok nie, maar hy weet sy is verbode vrugte en moet uit sy lewe bly.

’n Motorongeluk bring hulle nader aan mekaar, en Marlie vertel dat haar huwelik eintlik ’n besigheidstransaksie is tussen haar man en haar vader. Maar dit maak Marlie steeds verbode vrugte, waarvan Liam nie wil eet nie, al is die begeerte hoe oorheersend.

Tanya moet ’n lewensveranderende besluit neem, maar dan ontmoet sy vir Jean-Pierre. Hulle deel ’n passie vir die natuur en die beskerming van bedreigde plante, ’n liefde wat sy ook saam met oupa Ruben uitgeleef het. Is nuwe liefde genoeg, of is dit belangrik om dít waarvoor sy nog altyd gewerk het, ten koste van haar eie geluk te behou? Dis wanneer Jean-Pierre agterdogtig raak oor die geheimsinnigheid en gejaagdheid rondom haar komende huwelik met Francois, dat hy vir Tanya leer dat liefde én geluk is belangriker as aardse rykdom. Maar dit bly knaag waarom is Francois die erfgenaam van Dietenheim, en was Tanya se oorle’ oupa werklik so verbitterd dat hy haar nou met niks los?

Lisa sê nog altyd vir my dat ek is ’n oppervlakkige man wat te veel waarde heg aan wêreldse dinge, en nou staan ek op trou met ’n vrou wat my alles gee wat ek begeer. Maar is dit regtig wat ek begeer? Is Lisa, my vriendin, nie dalk die een wat daardie leegte in my siel vir altyd sal vul nie, die gat wat ek met aardse goed probeer toestop? Ek moet nou kies tussen twee vrouens. En dan gaan staan ek soos ’n swaap in die middel van die straat en word omgery voor ek vir Lisa kan vertel hoe ek voel.

Alana se ma reken dit is tyd dat sy nou trou en besluit dat Rudolf is die perfekte kandidaat. Maar Alana voel onrustig, want alles aan hom is té perfek. Of is dit maar net omdat sy, volgens haar ma, ‘té vol strooi’ is oor goeie mans. Dan ontmoet Alana vir Daniel, met sy mooi oë wat tot die bodem van haar wese inloer elke keer as hy na haar kyk. Suksesvolle Rudolf, wat haar begeer, of besorgde Daniel, wat ’n meisie in die Kaap het? As die bome maar net wou antwoord as sy met hulle praat, dan sou hulle vir Alana soos ’n skoenlapper in die woud kon vry maak.

Maryke benodig ’n wegbreek en gaan saam met haar nuwe vriend, Keano, na die eksklusiewe Seyfereiland toe. Hulle wandel in die woud verander egter in ’n nagmerrie en toe Maryke dae later daar uitstrompel, hoor sy dat Keano is vermoor en sy is die hoofverdagte. Gelukkig neem die forse Mitchell haar onder sy vlerk en die twee besef gou dat daar meer agter die moord lê as wat die polisie vermoed. Maryke leer ook dat werk is nie al waaroor die lewe moet gaan nie en dat Mitchell is dalk die man van haar drome. Sy moet egter eers uitvind waarom Keano haar so diep die donker woud ingeneem het, voor sy aandag aan haar gevoelens vir Mitchell kan gee.

Gene word gevra om ’n vriendskap met Hugo op te bou, alhoewel dit gou blyk dat almal wil hê dat dit spoedig tot 'n huwelik moet lei. Hugo is ’n redelik aangename man met goeie maniere, maar ook ongelukkig oor die familieplaas en sy betrokkenheid. Dis egter vir Gene moeilik om op te hou dink aan Elia, Hugo se ouer broer en die een wat die blinde afspraak gereël het. Dit is ook Elia wat haar amper daagliks kom optel om op die plaas te kom kuier. Wie moet Gene kies?

Lindie koop die vervalle Swaanpark en huur ’n boumaatskappy op te help met die restourasie van die vakansie-oord. Onbekend aan Lindie, is Bernard, haar eks-man, ’n vennoot in die maatskappy en dis hy wat by Swaanpark opdaag. Sy maatskappy is egter die beste met hierdie soort werk en Lindie besluit dat sy Bernard se teenwoordigheid maar sal moet verdra. Oor die komende weke besef beide Lindie en Bernard dat ’n derde persoon in die geheim verantwoordelik was vir die opbreek van hul huwelik en dat hulle steeds gevoelens vir mekaar het. Ongelukkig is daar verskeie persone wat nie die hereniging van Lindie en Bernard se liefde vir mekaar sal duld nie.

Kato Viljoen is nie net die nuwe veearts op die dorp nie, maar ook die punt van aandag vir elke jongman in die distrik. Sy moet behoorlik bontstaan om hulle weg te hou. Dis egter die kortaf Conrad Hoffman wat glad nie in haar belangstel nie, oor wie sy nie kan ophou dink nie. Maar hy dra ’n trouring en na die bloutjie wat sy met (die getroude) Flip geloop het, probeer Kato red van haar reputasie wat nog oor is om te red. Die lewe se draaie bereik breekpunt wanneer die waarheid oor almal se verlede op ’n dramaties punt tot die lig kom en Kato se lewe dodelik bedreig word.

Die koerant kry ’n wenk dat Justin Hudson, ’n afgetreede mynmagnaat, nou met perlemoen smokkel op Gansbaai. Eloise moet die storie gaan ondersoek, onder die voorwendsel dat sy oubaas Hudson se biografie wil skryf. Sy kinders vermoed onraad, veral Matthew, alhoewel hy tog ook aangetrokke voel tot Eloise. Dit is wanneer Eloise vir Justin Hudson en Matthew agtervolg terwyl hulle ’n duistere transaksie beklink, dat Eloise se kop en haar hart met mekaar begin stry – want sy hou van oom Hudson en Matthew laat haar veilig en warm voel.Waarom sal die Hudsons, met hul biljoene, dan by perlemoensmokkelary betrokke wees? Eloise besef sy sal die hele sindikaat moet oopvlek om te weet of sy haar hart aan Matthew kan gee.

Maria gaan kuier Desember by die Steyns, spesifiek tannie Susan en haar drie seuns, Daan, Riaan en Jan. Op skool was Maria en Jan dik vriende, hulle het alles wat stout was saam gedoen, terwyl sy en al die ander meisies smoorverlief was op die aantreklike Daan. Dinge is nou anders, want hulle het mekaar jare laas gesien en baie het intussen gebeur. Hulle het almal groot geword, veral Maria en die destydse boekneus Riaan. Dinge is nou definitief anders. Waarom voel Maria so aangetrokke tot die somber en bot Riaan? Is dit omdat hulle altwee hul eie diep hartseer het?

Alana het nog altyd gereken dat Darryl maar net die skaam tipe is wat nie onnodig uitbrei oor homself nie. Dinge verander egter drasties wanneer Dwayne opdaag en Darryl genoodsaak is om die donker geheim in sy verlede met Alana te deel. Wat volg, is ’n harde toets van Alana se liefde vir Darryl … maar ook word die twee broers gedwing om te leer wat dit werklik beteken om te vergewe. Sewentig maal sewe keer.

Daniël Gericke, kleinseun van Daniël senior, is ’n argitek en aandeelhouer in sy oupa se ontwikkelingsmaatskappy. Oupa Daniël dreig om hom te onterf as hy nie trou en ’n erfgenaam voorsien nie. In ’n restaurant hoor hy hoedat hy beswadder word deur Lucille Meyer, wat hy al vir maande vermy. Haar vriendin, ’n regte klein snipgesig, verklaar onomwonde dat sou sý hom dalk eendag ontmoet, sy vir hom sal wys waar Dawid die wortels gegrawe het.

’n Meisie storm eendag in sy kantoor in. Niemand anders as die snipgesiggie, Sonnike Calitz, nie. Sy soek hulp om haar pa, wat daar werksaam was, se onskuld te bewys nadat hy van geldverduistering aangekla word. Hier sien hy sy kans om wraak te neem. Hy sal help slegs as sy instem om met hom te trou. Hý sal nou vir háár wys waar Dawid die wortels gegrawe het.

Amy moet na haar pa se dood by oom Daan en tannie Kitty gaan woon. Sy was nog altyd ’n ongelukkige en teruggetrokke kind, maar nou bestaan haar lewe slegs uit skool toe en in haar kamer sit. Dit is dan, wanneer sy alleen wegkruip, dat sy haarself oorgee aan Theo se musiek. Theo, die uiterlik rowwe seun met die tattoeëermerke, wat ook nes Amy die pyn van verwerping en verlating deur ’n ouer dra. Theo, wat in dieselfde huis woon, maar nooit gesels of groet nie.

Amy en Theo besef egter dat deur mekaar te ondersteun, kan hulle die verdriet van die verlede oorkom en hulself toelaat om te lewe en liefde te vind.

Naomi moet die onverklaarbare dood van dolfyne gaan ondersoek. Sy beland in die enigste gastehuis op ’n klein, afgeleë gehuggie, waar die ander gaste ’n klomp mans is wat heeldag visvang. Behalwe die geheimsinnige Herman wat dalk net te veel in haar werk belangstel. Dit blyk gou dat die taak nie so maklik gaan wees nie en dat visvang is nie al waarmee die mans hulself besig hou nie, tot so ’n mate dat Naomi se ontluikende gevoelens nie net verraai word nie, maar dat sy naderhand ook in lewensgevaar verkeer.

Linda en Daniël se kar gaan staan langs die pad wanneer hulle probeer vlug van Marko. Desperaat omdat niemand wil stop en help nie, aanvaar hulle Hermanus se aanbod om die motorkar na sy plaas toe te sleep en daar te oornag. Soos die dae verby gaan omdat daar gewag word vir parte vir die kar, vind hulle die rustigheid wat nog altyd in hul lewens onderbreek het. Daniël en Hermanus word groot vriende, maar Linda moet haar verlede konfronteer wanneer die wrede Marko opdaag en haar met geweld probeer opeis.

Lindi besluit om ’n pos as veearts op ’n klein plattelandse dorpie te aanvaar, hoofsaaklik om finaal afskeid te neem van Alex. Daar ontmoet sy vir Dirk, die aantreklike (en ongetroude) beesboer wat haar sommer onmiddellik as onbekwaam behandel net omdat sy ’n vrou is. Tog blyk dit gou dat Lindi se vermoë as veearts nie werklik die rede vir Dirk se onbeskofde optrede is nie, maar met Lindi se eksman en die plaaslike rokjagter wat albei na haar vry, gaan Dirk ooit ’n kans gegee word?

Amelia word ingelig dat sy is die erfgenaam van ’n plaas in Ierland. Aangesien haar lewe nie te vlot verloop nie, besluit sy om sak en pak ’n nuwe begin in ’n nuwe land te gaan maak. Die aankoms is egter nie soos sy verwag het nie en word Amelia uit noodsaak gedwing om vir eers te loseer by haar toekomstige buurman. Hy reken egter dat alles is nie pluis met die erflating nie en begin ondersoek instel. Om alles te kroon, is Amelia skielik seker dat haar erfplaas tans bewoon word deur die misbaksel wat jare gelede haar lewe verwoes het.

Marlene is skielik werkloos en alleen, want die man vir wie sy lief was, reken hy het haar nie meer nodig nie. Sy gaan Natal toe om daar by die see haar kop en haar lewe uit te sorteer en ontmoet vir Henk Hoggan, ’n wyse omie wat haar help om die lewe te verstaan. Dinge verander egter wanneer die Hoggans se gluten-vrye seun opdaag en Marlene ontdek dat sy het ’n talent vir skoene ontwerp.

Maar is beroemdheid en twee honde, ’n trop ape, ’n pou en haar kuikens, kolganse en ’n vreeslike flankerige koningrooibekkie genoeg? Het mens nie ook liefde in jou lewe nodig om vol te kan wees nie?

Petro se liefde word deur haar verloofde verraai en dan vind sy boonop uit dat sy is swanger. Hoe gaan sy die skande en oneer ooit verwerk?

Dewald word gejag deur ’n gewetenlose vrou wat besluit het dat hy nét die regte man vir haar gaan wees.

Petro en Dewald besluit om ’n skynhuwelik vir so drie jaar aan te gaan, want dan word beide se probleme mos opgelos. Hulle het egter nie rekening gehou met hul eie gevoelens nie … en veral nie met die vasberade Celia nie, wat tot gevaarlike uiterstes gaan om haar man te vang.

Deal Apteek benodig ’n voltydse boekhouer en Marlize is perfek vir die werk. Sy kan egter nie verstaan waarom Deon, die een apteker en mede-eienaar, konstant fout vind met wat sy doen nie, wanneer hy oor die algemeen vriendelik is met die ander personeel. Dis ook nie asof sy ogies maak vir hom nie, want Marlize weet beter as om met getroude mans te lol. Dinge bereik egter breekpunt wanneer Marlize se narsissistiese eks-verloofde, Paul (nou getroud en met ’n kind), by haar begin vlerksleep en almal by die apteek vir Marlize oordeel omdat sy toegee aan sy opdringerigheid. Sy besluit dat vlug en verdwyn is die enigste oplossing. Tog kan sy nie die mense van Deal Apteek heeltemal agterlaat nie, veral nie toe Deon se lewe ingrypend verander nie.

Met ’n graad in joernalistiek en geen kennis van spreitabelle kom Marilise na twee jaar in Londen terug op haar tuisdorp. Werk is skaars en hubare mans ook – tot die dag toe alles verander en sy al gou moet kies tussen die nuwe jong veearts en die man wat haar die loopbaan van haar drome aanbied. Maar watter een is vir haar? Liefde kan so bedrieglik wees soos die uiterlik van haar verkeerde­veerkanarie …

Roelien moet terug na die familieplaas terwyl haar ma se boedel afgehandel word. Terug na die plaas wat haar pa opgegee het vir ’n lewe in die stad. Dis ’n groot aanpassing en haar wildebras niggie kan maar net nie help om dinge onaangenaam te maak nie. Dis egter die aantreklike plaasvoorman en die jong prokureur uit die stad wat vir Roelien – en haar niggie – in twyfel laat oor familie en liefde … en beide moet die keuse maak tussen plaas en stad.

Vir jong Nikita voel dit soos die einde van haar wêreld toe Antoni in ’n vliegramp sterf. Sake vererger soos sy betrek word by die duistere gebeure wat aanleiding gegee het tot die ongeluk – soos die versteekte kluis in ’n pakkamer. Renier, ’n suksesvolle besig­heidsman, ontferm hom oor haar situasie, maar voer ’n opdraande stryd om haar hart te wen. Te veel belange is op die spel en die ondersoekspan krap onder elke klippie.

Sake bereik breekpunt wanneer Antoni se ware lewe aan die lig kom en Nikita besef dat sy het nooit werklik haar broer geken nie. Met alles verlore, moet sy op Renier vertrou of is hy ook net besig om haar te gebruik?

’n Spook in ’n koringland op ’n plaas tussen êrens en nêrens. Hoe cliché.

Heidi se wêreld tuimel inmekaar toe haar man hulle bankrot dobbel, en haar enigste heenkome is om saam met haar ma en ouma in ’n plaashuis te gaan woon. Omring deur koringlande en platsak, moet sy die dorp se mense trotseer om haar waardigheid weer op te bou en ’n nuwe lewe te begin.

Dis egter nie so maklik nie, met Ben (haar aantreklike buurman), Nicolaas (’n pierewaaier uit die stad) en Werner (die man van wie sy wil skei) wat aldrie meeding om haar aandag. En oom Daan wat elke aand in die koringland spit spit spit …

Kort na ’n heerlike somerromanse raak Breggie verloof aan die opwindende Werner Gouws. Eers tydens hul verlowingspartytjie kom sy agter wat die galante heer se ware bedoelings is – en ontmoet terselfdertyd vir die eerste keer sy ouer broer Marius, wat haar terstond daarvan beskuldig dat sy is ’n flerrie en ’n fortuinsoeker.

Breggie vlug, met die vaste besluit om wraak te neem. Sy kry haar kans, maar raak dan hopeloos verstrik in omstandighede wat haar hulpeloos laat gryp na ’n laaste strooitjie om haar waardigheid te red.

Nicolette het ’n oordeelsfout gemaak.

Nou, nege maande later, verander haar eensame bestaan op verskeie vlakke wanneer sy saam met die geheimsinnige man in woonstel ‘16’ afry in die hysbak en in kraam gaan. Hy help haar om by die hospitaal te kom en, alhoewel hy na die tyd baie behulpsaam en ordentelik optree teenoor haar en haar klein babatjie, kan Nicolette nie anders as om te dink dat hy meer soek as net vriendskap nie. Geen man is so goed en verdraagsaam nie, veral nie teenoor ’n enkelma van ’n pasgebore baba nie! En wat is nogal die kastige ‘projek’ wat hy alewige as verskoning gebruik waarom hy nie gereeld kan kom kuier nie?

Nicolette se verstand sê dat hy haar net aan ’n lyntjie hou vir ingeval, maar haar hart skree LIEFDE!

Al wat Froon Froneman wil doen is om die wêreld se armes en straatkatte te voed met oorskietkos uit sy restaurant. Vir meisies het hy nie tyd nie, totdat hy hom in Mart vasloop – klein, maer Mart wat lyk asof sy lanklaas ’n ordentlike bord kos ingekry het. Amper ongemerk begin die twee se stryd om mekaar se harte, waarin Froon gedwarsboom word deur sy familienaam en Mart deur ’n persoon uit haar verlede wat onverwags opdaag. Dan is daar nog die skatryk Vanessa wat Froon as haar verloofde opeis, ’n kletsende kerkkraai, ’n gesteelde trofee en die slaaisous wat vir Froon beroemd gaan maak …

Is liefde sterk genoeg om ongeskonde deur meer moeilikheid as waarop albei bedag is, te kom?

Toe Ronèl se lieflingperd verkoop word sien sy net een pad oop vir haarself: sy moet saam met hom gaan om te keer dat hy mishandel word oor die een fout wat hy het. So beland sy op Norval Equestria, die spoglandgoed van haar droomheld, die kampioenruiter Lourens Norval en kom al die eerste dag voor raaisels te staan wat haar dronkslaan. Hoekom koop Norval ’n perd wat gebore is vir dressuur, terwyl hy mik na die Olimpiese skouspringtoernooie? Hoekom moet Blazoen ’n ander naam kry? Wat weet die opperkneg Jackson? Hoekom tree die ander stalknegte so vreemd op? Wat het gebeur in die versteekte hutjie in die bosse? En om alles te kroon: hoekom verander die onbeskofte Norval se houding teenoor haar ewe skielik? Iets is nie pluis nie.

Ronèl en haar nuwe vriendin Janet span saam om die geheime te ontrafel, wat lei tot ’n ontstellende klimaks in die skouspring-arena.

Katrien staan op trou met ’n man wat haar alles sal gee. ’n Maand voor die bruilof verklaar hy egter dat hy wil nooit kinders hê nie. Ten einde hierdie toekomstige leemte in haar lewe te verwerk, gaan stap Katrien in die berge. Daar word sy beseer toe sy gly en val, maar word gehelp deur ’n eksentrieke bergman en sy hond.

Katrien moet nou besluit of sy vir altyd in ’n weelderige, maar kinderlose huwelik wil wees, en of sy alles moet laat vaar om uit te vind wie is die aantreklike bergman wat homself so afsonder van die wêreld.

Elize het haar man verloor in ’n verdagte bootongeluk. Die versekering betaal teësinnig uit en Ruan Vorster word aangestel om die saak verder te ondersoek.

Alles is duidelik nie pluis nie, want Elize tree op asof sy kranksinnig word. Ook weier sy om die versekeringsgeld te aanvaar. In ’n poging om agter die kap van die byl te kom nooi Ruan haar om saam met sy suster en dié se verloofde ’n langnaweek op sy wildplaas deur te bring. En dis dan wanneer Ruan ontdek dat Elize se eienaardige gedrag te make het met ’n persoon wat direk betrokke was by die ongeluk: ’n handlanger, of dalk haar oorlede man se spook?

Agtienjarige Tita Verster is die probleemkind van Kroondorp. Marius de Wet, die jong plaaslike dokter, vermoed dis omdat sy deur haar ma verwaarloos is, en ontferm hom oor haar as interessante ‘geval’. ’n Ramp van ’n partytjie laat Tita egter so ver in haar dop terugkruip dat Marius alle moed verloor.

Totdat iemand uit sy eie verlede opdaag wat Tita se toekoms ook wil verander …

Na jare van weghardloop besef Miena dat sy moet terugkeer na die huis waar sy grootgeword het, om haar verlede te konfronteer.

Daar ontmoet sy Dawid, wat nie haar verlede ken nie. Hy stel ook nie daarin belang nie, maar Miena is bang dat sy hom sal verloor as hy weet wat daardie aand, agt jaar gelede, gebeur het.

Al wat in die pad van Olga se vurige liefde vir die skool se sportheld Michael staan, is sy meisie, die pragtige Kayla. Hoe kan sy by haar verbykom? Kayla, wat vir haar aaklike sms’e stuur en hul klasmaats teen haar opsteek. Olga moet iets doen toe “x no” nie meer genoeg is nie. Gaan Plan D slaag waar Planne A, B en C misluk het? Maar vir Plan D moet sy ouboet Nico se hulp inroep, wat nie baie lus is daarvoor nie – en intussen is daar Michael se beste vriend, die bleeksiel Hennie, wat op haar verlief is, ’n meisierugbyspan, ’n nasionale wiskundekompetisie en ’n paar porsies poeding om sake nog moeiliker te maak.

Tanya is daarvan oortuig dat haar ouers gaan skei en dat dit haar skuld is. Hoe kan sy dit keer? Haar pa sê hierdie vakansie by die see is hul laaste, die tyd raak min! Daarby dring haar beste vriendin aan op ’n vakansie-romanse – as sy net geweet het hoe. Haar planne loop een vir een skeef en daarby kom krap die aantreklike Rick ook nog die pot deurmekaar met ’n agenda van sy eie. Tanya vind uit wat liefde is, en ’n hele paar ander goed op die koop toe.

Suné is vyftig jaar oud en eensaam, totdat sy op aandrang van haar kinders op ’n safari-tog na Zambië gaan. Sy maak kennis met haar agt mede-toergangers, en word veral beïndruk deur die aantreklike Bart Jacobs, ’n wewenaar-sakeman met sielewroeging. Alle geheime drome wat sy ondanks haar teenstand begin koester vervaag egter wanneer hul vliegtuig in die wildernis neerstort en die nege reisigers in ’n stryd om oorlewing betrokke raak. Tog bly die vlammetjie van liefde in Suné brand …